caderno dun rencoroso enfermo de cinefilia
Inicio > Historias > O 2005 en blogs
> O 2005 en blogs <

2005 foi o ano dos dous xantares do blogmillo, coñecidos no sucesivo como xantanzas, unha alá por xaneiro e outra en vésperas do Nadal, declarándoo coma quen di oficiosamente inaugurado. Dous encontros cordiais e bonitos, dúas festivas oportunidades para rachar ese anonimato onanista que nos atribuíu un alegre poeta. Pasaron só dous anos desde aquela primeira tarde na Coruña na que o Dr Zippie fixo reparto das famosas diapositivas de Mildred e Cecil entre os sete ou oito que estabamos, até os encontros de agora, con ducias de comensais arredor dunha mesma mesa como reflexo fiel dese milleiro de bitácoras que levan aparecido na nosa lingua.

Hai un bo feixe de razóns que explican con indiscutíbel claridade e elocuencia a máis que xustificada atención que vén despertando ultimamente o blogmillo, entre elas a páxina de Brétemas, o máis blogueiro dos blogueiros ilustres, e a do monstro do canon, home este dotado da suficiente intelixencia e sentido do humor como para non enfadarse comigo cando dentro duns días faga un post poñendo un pouco podre a súa última e premiada obra. Engadan á lista de citados esa hábil mestura de cinefilia e frikismo; as alfaias de Folerpa, que se revelará este 2006 como un excelente novelista, e sobre todo a Xosé Manuel Pereiro, sen dúbida algunha un dos máis brillantes columnistas que hoxe por hoxe existen na prensa, e non me refiro só á galega.

Ao longo do 2005 vimos medrar a opedriño e a xan, e soubemos das ocorrencias dos pelachos, capaces de propoñer preguntas desarmantes e de inventar respostas luminosas. Desde Bilbao, Oier sorprendeunos de cando en cando con maravillas como esta, un fermosísimo haiku en prosa de arrebatadora simplicidade, para min un dos mellores textos do ano. Outro tanto cabería dicir desta peza de Cesare, inesquecíbel por múltiples motivos, o máis literario e emotivo recordo que gardará a rede do longamente agardado cambio de era. O güisque de alegría deu logo até para unha cadea humana, argallada contra un fondo de pesimismo e frialdade expectante por parte daqueles que non comprenden que os partidos tamén se gañan por un só gol de diferenza.

Exceptuando a imprescindíbel lección diaria de xornalismo honesto que nos regala Martínez Soler e o agora reaparecido manantial de sueños de Somnio, practicamente non visito ningún outro blog en español fora dos do meu barrio blogalita, e o caso é que por esa parte da rede non hai grandes novidades. Vendell continúa coma sempre, é dicir, insuperábel, e El Pez segue padecendo o pertinaz acoso de comentaristas descerebrados. Víctor acabou o ano algo ausente, igual que Jaio, metida ela como está en tantos labores, algún deles especialmente gratificante. Ao Paleofreak non o leo nunca porque os dinosauros interésanme case tanto coma o futebol, pero como é amigo cítoo igual. No 2005 tiven ademais o pracer de falar con yildelen polo casco vello de Donostia e de trasnoitar con Ctugha e un variadísimo grupo de europeos que congreseaban no meu povo.

César Valente, o mestre de Santa Catarina, deu por pechada a súa Carta aberta, pero déixanos saborear o seu irónico humanismo nos seus artigos do Diarinho. Á espera de que o Pedro Lemos volva bloguear como el sabe, as bitácoras do Brasil permítennos gozar do incansábel talento do Inagaki, da fascinante panorámica do mundo da publicidade que elabora Carlos Merigo ou da sorprendente madurez do xove Cayo. Máis perto, aquí ao sur do Minho, o Substrato do Monstro Horrendo Adamastor é lugar de paso diario malia non amosar eu moito aprezo pola banda deseñada, tema alí recorrente. Ao Nuno Catarino aínda non lle agradecín dabondo a súa xenerosidade; aproveito para facelo aquí e agora, recomendándolles vivamente a súa páxina, tecida polo amor ao jazz. O Diario de uns ateus é un recuncho utilísimo, inzado de artigos e ensaios de sólida lucidez, característica esta última que tamén serve para definir a Miguel Vale de Almeida, que aos habituais destes días estranhos non lles resultará descoñecido. O Renas e veados e o Blogo Social Portugués funcionan como verdadeiros portais de noticias nos que é imposíbel non atopar algo interesante, igual que na enciclopédica Memoria Virtual do Leonel Vicente, pai tamén dunha fantástica iniciativa na rede que responde ao nome de Proximizade. Pedro Magalhães somete as sondaxes a unha análise rigorosa e escéptica en Margens de erro, un blog que debera ser lectura obrigada para todos os xornalistas, e Carla convídanos a visitar Elsinore regalándonos as súas fermosísimas fotografías. Deixo para o final a Rua da Judiaria de Nuno Guerreiro, xudeu lisboeta a punto de trocar Los Angeles por Nova Iorque, que nos ofrece unha perspectiva da súa cultura e do conflito palestino-israelí moi valiosa para eliminar algúns prexuízos.

Internet dá voz ao continente que máis nos doe. Podemos percorrer a África lusófona de blog en blog, do Moçambique do Ma-Schamba á Angola do Eugénio Costa Almeida, saltando logo ao Cabo Verde de Transpórtis virtual di Kauberdi pa Aulil e Lantuna e rematando na Guiné-Bissau do moi necesario Africanidades, que se tomou un tempo de descanso deixándonos para o recordo unha extraordinaria colección de imaxes. E se se animan vaian onda Ndesanjo Macha, aínda que só sexa para comprobar o pouco swahili que sabemos (de gikuyu tampouco é que andemos moi sobrados). Non entendemos nadiña, pero axudan a desfacer tópicos.

Déixolles, para rematar, o mellor blog que coñezo, especialmente valioso polos seus atinados artigos sobre cine: Long pauses, de Darren Hughes, visitante asiduo do Festival de Toronto onde descobre os filmes de Claire Denis e Tsai Ming Liang varios meses/anos antes ca min. Dito sexa con envexa. E moita.

2006-01-05, 02:21 | 24 comentarios

Referencias (TrackBacks)

URL de trackback de esta historia http://pawley.blogalia.com//trackbacks/36273

Comentarios

1
De: ArvPart Fecha: 2006-01-05 09:00

Jo, que chulo.



2
De: Eugénio Costa Almeida Fecha: 2006-01-05 12:30

Pois. Mas há que não esquecer um grande blogue, "días estranhos", uma viagem quase diária.
Bom Ano de 2006.
Eugénio Costa Almeida



3
De: EMF Fecha: 2006-01-05 14:21

Imperdoábel.

Imperdoábel que nom cite ao "pai" (espiritual, cando menos) da bloGaliza e um dos melhores blogs em calquera idioma.
"Días estranhos", "porque yo lo valgo".



4
De: Bretemas Fecha: 2006-01-05 20:25

Pawley, débolle moita da miña adicción blogueira aos seus dias estranhos. O meu maior recoñecemento para o seu blo, un dos mellores que coñezo en lingunha calquera. É un orgullo para os blogueiros galegos telo como referente. Abrazos.



5
De: peke Fecha: 2006-01-05 22:05

Bicos, Martin, onde queira e como queira. ;)
¡Ah! E se as cousas non se torcen, está convidado á moá casa en Ítaca dentro dun ano.



6
De: peke Fecha: 2006-01-05 22:06

"á miña casa", por suposto.



7
De: Vendell Fecha: 2006-01-06 00:47

Fantástico este blogroll en prosa ;-)



8
De: Paco Penas de DORVISOU Fecha: 2006-01-06 01:03

Eu non esquezo de que foi DíaS eSTRaNHoS o primeiro blog no que alunicei e co que alucinei tamén. Sempre dixen que é un deses blogs que nunca deixa indiferente a ninguén.
¡Saúde e terra!



9
De: Leonel Vicente Fecha: 2006-01-06 09:21

Obrigado, companheiro, pelas referências ao Memória Virtual e ao Proximizade (que resulta da colaboração de um grupo de pessoas).

Parabéns por este 'post'. Falta nele a referência ao Dias Estranhos...

Um abraço.



10
De: Pedro Lemos Fecha: 2006-01-06 14:40

Olha .. Estão todos aí! Um abraço, Pedro.



11
De: Martin Pawley Fecha: 2006-01-06 19:34

ArvPart, EMF, botámolos de menos na xantanza. Para a próxima non nos falten, ho.

Eugenio, obrigado pelas suas amáveis palavras.

Brétemas, hónrame ser eu parcialmente responsábel de volvelo adicto aos blogs. Eu agradézolle a vostede a súa constancia na rede, algo aínda moi infrecuente nesta parte do mundo.

peke, irei, irei, non teña dúbida. Vaia preparando os bicos ;-)

Vendell, xa ve, sempre innovando :-)

Paco, non esqueza que ser o primeiro é, as máis das veces, unha simple cuestión de idade :-)

Leonel, unha magnífica colaboración, abofé que si.

Pedro, não estão todos: falta você! Queremos novos posts. Volte pronto!



12
De: Hai Cada! Fecha: 2006-01-07 00:27

Qué lindo pawley :).



13
De: Jaio, espía anarquista Fecha: 2006-01-08 03:13

Es que son ustedes muchos. El día que se pongan de acuerdo y den una patada al suelo a la vez... ¡si Mafalda levantara la cabeza! temería de la fuerza de los "galegos".

Salud y anarquía para "vostedes"





14
De: Martin Pawley Fecha: 2006-01-08 21:54

Si, si, Jaio: moito recomendarnos anarquía e logo descubrimos a súa insospeitada amistade cun ilustre político portugués, candidato a presidir a República (e polo que contan no Substrato, con máis enerxía da que coubera imaxinar á luz dos seus 81 anos...)



15
De: Folerpa Fecha: 2006-01-09 12:35

Meu benquerido Martin grazas polo epíteto de execelente novelista. Amais de coma corrector vou ter que contratalo tamén coma axente comercial :) Unha aperta.



16
De: irreal Fecha: 2006-01-10 15:17

aduaneiros, vakeiros e o macizo da aranheira, for example, non son dignos de ti, verdá, martín? non son cursis dabondo, non os entendes ou parécenche de la eta? E tenrura porno qué?

Desde o meu humilde rekanto turrarei por ti, MARTÍN POLI, para que un día che acaben concedendo o PREMIO FERNÁN VELLO ao mellor blog en galego. Non hai moitas diferencias entre ti e Fernán, Martín, diñeiro á parte.

só cambia o formato. e iso (na súa ipseidá) non é bo nin malo. pero moderno -o que se di moderrrrrrno- seguro que non é.

Moitas felicidades. A túa ousadía intelestuás é notoria.

koss



17
De: Kamikaze Fecha: 2006-01-10 16:28

A Aranheira mola moito, moito, moito.



18
De: María Fecha: 2006-01-10 17:01

Irreal: como lle dixeron ao outro, monta un blo e faite un home.



19
De: irreal Fecha: 2006-01-10 19:06

ti con tal de faguerme trabayar... qué diferencia hai entre un bló e unha sexy ficción? ks



20
De: Hai Cada Fecha: 2006-01-10 23:51

É ben peculiar: canto máis "famoso" é un blog ou o que o escribe, máis xentiña entra a dicirlle ao propietario qué é o que ten que dicir e cómo...
¿Será envexa, será ousadía intelectualsssss?
Unha aperta, Pawley.



21
De: irreal Fecha: 2006-01-11 00:07

pídoche as miñas máis sinceras desculpas, martín. atopei ao humbert humbert pola rúa -agora imita a ravachol na alameda, á hora das chapas- e díxome, desde a súa proximidá ao grupo terrorista intelixente -os daduana, os vakeiros e o arácnido, no papel de andreas baader-, que si os citaras no teu BLÓ KANNON.

JO KÉ CORTE.

o demais vale por enteiro. be careful coa "autoría", martín, non vaia ser que acabes asinando en calquera sitio, e o máis moderno que consigas sexa facelo como "martin pawley".

falando de "cultura viva", pídelle a césar os primeiros livros de contos de foster wallace, martín: é unha vergoña relativa que chegarades a el aínda por tras de luís ventosso. non sei se é "sublime", pero havos ser máis útil que harry potter. isso seguro.

e non te rías dos -bel-beis dos paleofalantes, que non sabes todas as coisas.

tampouco te anoxes por non levar razón. é o de menos. cando te decates de que a cagatxes, mira a ver: non se che vai meter o pito padentro. cres que aínda podes aprender de calquera ou reservas o cerebro para os colegas?

do you love me? i´m the one you´ve been waiting for...

koss



22
De: Martin Pawley Fecha: 2006-01-11 00:50

Uff, o meu problema non é xa que non queira responder a algúns comentarios, senón que non podo, porque cada vez entendo menos.



23
De: irreal Fecha: 2006-01-11 13:25

en esspaña din que non hai pior cego có que non quere ver. bótalle un ollo ao diccionario parémico galego, martín, a ver se atopas algo máis significativo. Seguro que si...

koss



24
De: leco Fecha: 2006-01-12 21:06

O día que o vin non tiña tempo de comentar e case me esquezo. Que post tan chulo! Post de posts! Obrigada por tanto que nos dá en tan pouco espazo.



Nombre
Correo-e
URL
Dirección IP: 54.198.190.185 (bff174eb9a)
Comentario









os arquivos estranhos




correo:diasestranhos()gmail.com

O sistema de comentarios está á disposición dos lectores de "signos de vida" (antes "días estranhos") exclusivamente para a publicación de opinións e comentarios relacionados co contido deste blog. Calquera texto publicado por medio do referido sistema non reflicte necesariamente a opinión do autor deste blog. As opinións e informacións publicadas no sistema de comentarios son de autoría e responsabilidade integral dos leitores que del fixeran uso. O autor deste blog resérvase o dereito de suprimir os comentarios e textos que considere ofensivos, difamatorios, calumniosos, preconceitosos ou de algunha forma perxudiciais a terceiros. Textos de carácter promocional ou inseridos no sistema sen a debida identificación do autor (nome completo e enderezo válido de e-mail) tamén poderán ser eliminados.


Licenza de 
Creative Commons
Esta obra está baixo unha licenza Recoñecemento-NonComercial-CompartirIgual 2.5 de Creative Commons. Blogalia

Blogalia

(c) Martin Pawley