Grazas en boa parte ás posibilidades de información e comunicación que ofrece Internet, hoxe temos acceso a unha cantidade de filmes inimaxinábel hai uns anos. Podemos estar ao día do que se está facendo e exhibindo en todo o mundo, tanto en salas comerciais como na vizosa rede alternativa de filmotecas e festivais. Cineastas que hai pouco ficaban condenados á invisibilidade absoluta circulan agora de boca en boca entre os afeccionados, que nos pasamos pistas os uns aos outros sobre as obras máis interesantes que aparecen aquí e acolá. A existencia dunha cinefilia activa e atenta permite que a industria acabe por sentir interese polos produtos menos comerciais, asumindo que aí hai tamén un valioso nicho de mercado. Películas como
Natureza morta de Jia Zhang-ke ou
O silencio antes de Bach de Pere Portabella, proxectadas só nos circuitos de versión orixinal, acumulan en España máis espectadores que o último e belicoso traballo de Brian de Palma,
Redacted; e nas tendas podemos adquirir packs de DVDs que recollen
as longametraxes do portugués
Pedro CostaJean-Luc Godard, a do
Grupo Dziga Vertov. Levados polo optimismo, case damos en pensar que se chegan ás salas películas tan pouco compracentes como
Tropical malady ou
A hamaca paraguaia, é que até as cousas máis insólitas poden acabar acontecendo.
Quizá así sexa, mais para algunhas aínda deberemos agardar un tempo. O número de filmes que seguen en listaxe de espera medra e medra sen cesar, e non falamos daqueles cineastas cuxa esixente obra se sitúa claramente á marxe do sistema, caso de
James Benning ou
Jean Marie Straub, senón de favoritos da crítica como
Bela Tarr,
Arnaud Desplechin,
David Gordon Green,
Hong Sang-Soo ou
Lisandro Alonso; dos últimos traballos de autores respectados como
Hou Hsiao-Hsien e
Wong Kar-wai, e mesmo de directores perfectamente integrados na industria americana como
Francis Ford Coppola,
Gus van Sant,
William Friedkin ou
Todd Haynes. Recuperar e estrear películas inéditas nas pantallas coruñesas é un dos obxectivos principais do Fórum Metropolitano, e así sucede en setembro na Sala Marilyn Monroe, co
máis recente filme de
Aleksandr Sokurov como prato forte.
Sala Marilyn Monroe: programación de setembro de 2008
Fórum Metropolitano, r/ Río de Monelos, s/n, 15006 A Coruña
4, 5 e 6 de setembro:
Visítanos a banda, de Eran Kolirin (Francia, 2007). Con Sasson Gabai e Saleh Bakri. 1h25min. VOSE.
11, 12 e 13 de setembro:
Seraphim Falls, de David Von Ancken (EEUU, 2006). Con Pierce Brosnan e Liam Neeson. 1h50min. VOSE.
18, 19 e 20 de setembro:
Aleksandra, de Aleksandr Sokurov (Rusia-Francia, 2007). Con Galina Visnevskaya. 1h32min. VOSE.
26 e 27 de setembro:
Cashback, de Sean Ellis (Reino Unido, 2006). Con Emilia Fox e Shaun Evans. 1h40min. VOSE.
Horarios: xoves ás 20.15, venres ás 20.15 e 22.45, e sábado ás 17.15 e 20.15.
¶
