Fixo películas estupendas aplaudidas pola crítica e o público. Morreu Sidney Pollack, o de Out of Africa e Tootsie; fica como derradeiro traballo seu un correcto documental sobre un amigo, o arquitecto que creou o Guggenheim, Sketches of Frank Gehry. A súa carreira cinematográfica, non tan longa como a primeira vista poderiamos pensar, contén un clásico do thriller setenteiro (Yakuza), unha dura parábola da condición humana disfrazada de maratón de baile (They shoot horses, don't they?) e un drama romántico con mensaxe (The way we were). Proporcionoulle a Paul Newman un magnífico papel nunha altura na que o mito estaba xa máis dedicado a vender mollos e facer obras benéficas que á interpretación; mais se hai un actor estreitamente vencellado a Sidney Pollack, ese é sen dúbida outro grande, Robert Redford. Con el fixo ademais das xa citadas Memorias de África e Tal como eramos unha alfaia do cinema político, Three Days of Condor, e dous westerns de beleza crepuscular, Jeremiah Johnson e The Electric Horseman, filmes de absoluta vixencia cuxa pegada é aínda hoxe ben recoñecíbel.



para saber máis: o obituario do New York Times. ¶