Na Sección Oficial do próximo Festival de Berlín concursa o filme brasileiro que máis deu que falar en 2007: Tropa de elite, de José Padilha, un director que sorprendeu hai anos cun interesante documentario, Ônibus 174, e que agora dilapida todo o seu crédito cun título cuarteleiro e reaccionario. Tropa de elite foi masivamente distribuída varios meses antes da súa estrea, tanto a través das descargas gratuítas por Internet como en venta pirata polos camelós de toda a nación; mais a publicidade do caso e a difusión do produto non só non restaron espectadores á película, senón que axudaron a convertela nun grande suceso. No equipo artístico, dous candidatos ao Oscar por Cidade de Deus: o roteirista Bráulio Mantovani e o montador Daniel Rezende. O verdadeiro problema é que mentres o vistoso aínda que moi discutíbel filme de Fernando Meirelles ollaba de esguello a Scorsese, Tropa de elite parece mirar máis ben cara a Chuck Norris para amosar un discurso inconsistente por ridículo e ademais profundamente obsceno. Concordo co que dixo en Libro de notas o meu amigo Xoán Lagares: lean o seu artigo, e tamén o de Arnaldo Bloch n'O Globo. Mesmo a resposta do actor protagonista, Wagner Moura, un dos de máis sona naquel país, ao que recordamos en Abril despedaçado, Carandiru e Cidade baixa. Prefiro lembralo coma o nugallán simpático de Deus é brasileiro que por este papel de Dirty Harry carioca. ¶