A do domingo é unha manifestación pola liberdade. Pola liberdade, si: a dos tres veciños do Eixo que están cumprindo unha condena desmedida e inxusta. Acaban de concederlles o segundo grao e grazas a iso poden saír a traballar polo día para volver a prisión cada noite. Algo é algo. Mais o segundo grao non significa aínda a liberdade. O segundo grao é unha situación intermedia entre a reclusión e o réxime aberto que aplican as institucións penitenciarias "a aqueles penados en que concorran unhas circunstancias persoais e penitenciarias de normal convivencia". É, pois, unha decisión da Dirección Xeral de Institucións Penais, non do goberno, e non ten nada que ver cun indulto. O indulto é outra cousa, e se hai un mes saímos á rúa para pedilo, este domingo temos exactamente as mesmas razóns para facelo. Máis, talvez, pois sabemos que o apoio popular a esta causa é un aspecto fundamental para conseguirmos que o indulto sexa concedido. Por iso a deste próximo domingo debe ser unha manifestación masiva. Temos que ser moitos os cidadáns que asistamos, para demostrarlles con claridade e civismo aos que deben tomar a decisión que estamos cos veciños do Eixo e que queremos que a súa situación se resolva canto antes. Vouno repetir unha vez máis: a manifestación do domingo significa liberdade. Liberdade para Xosé, para Simón e para Xesús. Liberdade para tres cidadáns; liberdade, en suma, para todos.

CONCERTO
Venres, 14 de decembro, ás 20:30 horas, no Auditorio de Galicia (Santiago de Compostela) CONCERTO SOLIDARIO COS TRES DO EIXO coa actuación de Espido (Guadi Galego e Guillerme Fernández), Talabarte Trío (Quim Farinha, Pedro Pascual e Kin García) e Marful. Presentará Xurxo Souto. Prezo: 6 euros (haberá fila cero).

MANIFESTACIÓN
Domingo, 16 de decembro, ás 12:30 horas, na Alameda de Santiago, grande MANIFESTACIÓN a prol do INDULTO PARA OS VECIÑOS DO EIXO.

para saber máis: Os tres do Eixo (blog) ¶