Da Praia das Lapas á do Orzán, da queimada á caipirinha, de Antonio Simón a Xaime Pena: mañá, con máis tempo e máis descanso, cóntolles o que deu de si esta fin de semana á cal aínda lle queda outra noite longa. Avánzolles xa que a do venres arrancou coa estrea do excelente documental de Marcos Nine Pensando en Soledad, que revisa a figura dun dos pais do cine galego, José Ernesto Díaz Noriega, barcelonés afincado durante corenta anos na Coruña que lle meteu no corpo o veneno da cinefilia a moitos dos directores que logo intentaron facer filmes no noso país, como Miguel Castelo, Carlos Amil ou Xavier Villaverde. O documental véndese este domingo coa Voz de Galicia formando parte dun DVD extremadamente recomendábel que inclúe varias das pezas feitas por Díaz Noriega, incluída esa na que explica como rodar Cine amater a ritmo de cuplé; unha curtametraxe divertidísima que acabará sendo, xa verán, carne de YouTube. De todos xeitos, e dado que o DVD custa menos de catro euros, eu de vostedes non agardaba até entón. ¶