Ao informar sobre a colosal traxedia no Índico algúns medios de comunicación están amosando un desmesurado interese polos turistas falecidos ou feridos que a min non deixa de resultarme algo soez. Parece como se diferenciasen en dous tipos de categorías humanas: os turistas, tanto ten a súa procedencia, é dicir, xente coma nós, e os outros, que a ollos dos europeos peor informados parecen sempre unha masa indiferenciábel de individuos esfarrapados abafados por unha miseria que non sabemos ben en que consiste exactamente. Para algúns deses medios a noticia grande o domingo e o luns era a neve nas estradas españolas; o tsunami viña despois, aportando ademais unhas cifras de mortos ridículas por pequenas e por absurdamente precisas.

O meu desexo para o 2005: menos eurocentrismo, por favor. ¶