Os dous grandes documentais do ano están cheos de palabras. Escritas, ou máis ben esculpidas, nun deles, Profit motive and the whispering wind, a obra mestra de John Gianvito; declamadas con intensidade e paixón no outro, Of Time and the City, o novo prodixio cociñado por Terence Davies que teñen ocasión de ver mañá mércores ás 20:30 no Centro Galego de Artes da Imaxe. Un canto de amor e odio ao lugar onde naceu e se criou o cineasta, Liverpool, e tamén un repaso pola súa memoria e pola formación da súa identidade. Na primeira proxección do documental no Festival de Donostia un estraño erro eliminou da banda sonora a voz en off. Saín do Kursaal 2 completamente perdido, sen entender a aqueles que a viran en Cannes e volveran entusiasmados: aquilo era unha pura sucesión de imaxes descontextualizadas, nada que puidera producir a máis mínima emoción. Un segundo pase ao día seguinte serviu para arranxar a desfeita: é a voz impagábel de Terence Davies a que lle dá sentido a todo a través duns textos memorábeis que mesturan humor e lirismo, saudade e retranca, o ton máis íntimo e o discurso máis corrosivo, exultantemente ateo e republicano. Unha marabilla a non perder. ¶