A semana pasada o presidente Touriño
anunciou a súa intención de completar a lexislatura, mais deixou a porta aberta a un lixeiro adianto técnico das eleccións galegas coa intención de que non coincidan coas europeas de xuño e reservar así un espacio de debate específico para a política autonómica. Partindo desa condición, e do feito de que entre uns comicios e outros deben transcorrer polo menos noventa días, a verdade é que o calendario non deixa moitas alternativas. Non hai data oficial para as eleccións europeas, mais o probábel é que se celebren o
domingo 14 de xuño. Se restamos os noventa días antes citados, quédannos tres domingos posíbeis de marzo: o 1, o 8 e o 15. De se celebraren as eleccións o
domingo día 1, a pegada de cartaces arrancaría ás cero horas do venres 13 de febreiro, e se fosen o
domingo día 8 unha semana despois, o venres 20. Nos dous casos a campaña electoral atravesaría por completo o Antroido [1], circunstancia que se presta a moitas piadas. Se as eleccións fosen o
domingo 15 de marzo, a campaña electoral comezaría o venres 27 de febreiro, co Antroido xa rematado. Eu aposto, xa que logo, polo 15 de marzo.
[1]
O Martes de Antroido cae 40 días antes do Domingo de Ramos, o anterior ao Domingo de Pascua, que coincide co primeiro domingo despois da primeira Lúa Chea da primavera. O primeiro plenilunio primaveral en 2009 é o 9 de abril, xoves, e en consecuencia a Pascua celébrase uns días despois, o domingo 12. Se lle restan a esa data 46 días obteñen a do Mércores de Cinza, o 25 de febreiro.
¶
