Tres de cada catro mortes por SIDA prodúcense na África subsahariana, rexión que acolle a máis do 60% dos infectados polo virus. Dous millóns de mortos cada ano, o que equivale a un cada quince segundos: as cifras son tan elocuentes que diante delas sobra calquera comentario.

Á hora de corrixir esa tráxica estatística, a educación ten unha importancia decisiva. Desde hai unha década o proxecto Historias de África aposta polo cinema para transmitirlle información á xente, especialmente ás persoas máis novas. Directores de renome internacional como Idrissa Ouédraogo, Cheick Oumar Sissoko ou Mahamat-Saleh Haroun participaron nesta iniciativa dirixindo curtametraxes sobre a SIDA baseados en ideas aportadas por mozos e mozas da África Occidental. Nas próximas semanas iremos revisando no blog moitas desas pezas; empezamos hoxe coas tres que fixo un dos grandes cineastas da actualidade, Abderrahmane Sissako, autor de Agardando pola felicidade e Bamako:


The first step (O primeiro paso), baseado en ideas orixinais de Sanwé Médard Kiénou (20 anos, Burkina Faso), Liliane Sipouwoua (18 anos, Camerún) e Carmelle Nadège Hounnou (20 anos, Benin).



Sexually Transmitted Marks (Notas Sexualmente Transmitidas), baseado en ideas orixinais de Kossi Yesunyo Gossou (18 anos, Togo) e Régis Nkouma (20 anos, República do Congo).


Good reasons (Boas razóns), baseado en ideas orixinais de Ndèye Diasse Samb (18 anos, Senegal) e Guy Merlin Wayap (21 anos, Camerún). ¶