Isto que ven aquí arriba é o director's cut de Límite 12 horas, o artefacto-arroutada fabricado (máis ou menos) no tempo que indica o título durante o Festival On/Off de Ribadeo de 2007. O director, Marcos Nine, tamén é o responsábel de Historia dunha parroquia, documental que xira arredor de Luis Angel Rodríguez Patiño, o inclasificábel párroco de Xestoso. Historia dunha parroquia é candidata aos Premios Mestre Mateo nas categorías de mellor documental, mellor música orixinal (Manuel Riveiro) e, atención, mellor dirección, co amigo Marcos a compartir nervios con autores de longametraxes para cinema (e non por iso de máis calidade) como Jorge Algora e Rodrigo Cortés. Hoxe proxéctase Historia dunha parroquia no Fórum Metropolitano da Coruña, ás 20:30 na sala Fernando Rey, e teremos o pracer de telo a el en persoa contando cousas sobre a rodaxe e sobre o crego, que será aínda máis interesante. Quen non poida asistir hoxe, ten dúas novas oportunidade mañá venres, coa curta Vilaboa, mirando á Meca como complemento. ¶