Tal día coma hoxe de hai cen anos nacían en Brighton, Inglaterra, dúas nenas unidas polas cadeiras e as nádegas, fillas dunha muller solteira chamada Kate Skinner. A súa xefa, Mary Hilton, acolleu ás rapazas baixo o seu coidado, e con ese apelido pasaron á historia. Daisy e Violet Hilton contarían máis adiante os abusos aos que foron sometidas nunha familia que as preparou para que cantasen e bailasen vendo nelas unhas posíbeis figuras do vodevil. A súa infancia e adolescencia transcorreu nos escenarios. Actuaron en diversas cidades europeas, mais tamén en Australia e nos Estados Unidos, onde fixaron a súa residencia definitiva, e gañaron unha morea de cartos que xestionaron de maneira cobizosa os seus titores, dos que non se emanciparon até o comezo da década dos 30. Nesa época na que triunfaban nos teatros americanos accederon a participar nun filme de Tod Browning que acadou xusta celebridade, Freaks.



A súa seguinte aparición no cinema tardou vinte anos en producirse: Chained for life, unha produción de serie Z chea de elementos autobiográficos que fracasou estrepitosamente.



A fortuna doutrora foi esmorecendo co andar dos anos, e acabaron montando unha hamburguesería en Miami, The Hilton Sisters Snack Bar. O treito final das súas vidas foi ben triste. Durante unha xira para promocionar a reestrea de Chained for life, o seu manager deixounas abandonadas nun drive-in. Sen recursos para marcharen nin cartos para saíren adiante, houberon de poñerse a traballar nunha tenda: o dono mesmo tivo que mercarlles roupa, pois só tiñan a que lucían no espectáculo, obviamente inapropiada para un ultramarinos. Morreron vítimas dunha epidemia de gripe en xaneiro de 1969; a autopsia revelou que Daisy faleceu primeiro e que Violet seguiu viva como mínimo dous días máis. ¶