A nova non é de agora, mais eu acabo de coñecela: a Organización española para o libro infantil propuxo como candidatos para o próximo Premio Andersen de Literatura e Ilustración a Mariasun Landa e Ulises Wensell. Pola escritora vasca xa expresei a miña admiración no blog máis dunha vez, a conta desa obra mestra que é Krokodiloa ohe azpian, pola cal recibiu o Premio Nacional de Literatura Infantil e Xuvenil, ou desoutro prodixio que non canso de reler chamado Herioa eta Maistra, que mesmo ousei traducir ao galego. Unha escolla moi atinada a da OEPLI, igual que a de apostar polo grande Agustín Fernández Paz para o Premio Astrid Lindgren. Dareille a Mariasun os meus máis agarimosos parabéns dentro dun mes, alá en Donostia; vai este post como pequeno adianto. ¶