Da excelente Free Zone, unha verdadeira alfaia dirixida por Amos Gitai xa vista o pasado mes de novembro en Cineuropa, nos ocuparemos hoxe no Extrarradio aproveitando que se estreou onte en diferentes cidades españolas aínda que non chegou ningunha copia a Galiza. Si poderemos ver De battre mon coeur s'est arrêté, o filme de Jacques Audiard que resultou o grande triunfador dos últimos premios César e que será a película coa que eu despida aos Multicines Equitativa, que pechan dentro de poucos días.

En vésperas de que arranque o ciclo de road movies da Fundación Caixa Galicia no resto das sedes galegas despois do debut coruñés, teremos como cinéfila esta semana á súa programadora, Yolanda López, para falarmos sobre esas e outras viaxes iniciáticas e lerchear tamén un pouco sobre o estado do audiovisual galego. ¶