caderno dun rencoroso enfermo de cinefilia
Inicio > Historias > Sari, soñador de mares
> Sari, soñador de mares <

De cando en cando póñome neste blog a falar de literatura infantil e xuvenil, tema que sospeito non lles interesa demasiado, e case sempre para lamentar a escasa orixinalidade e ousadía que amosan unha alta porcentaxe dos libros que se editan, tanto en galego como en español. Sendo, como é, unha literatura inzada de mestres, segue habendo un feixe de autores que pretenden dar toda clase de leccións desde as súas páxinas, nos peores casos desde un ridículo espírito de colegueo cara uns lectores aos que sendo xenerosos lles triplican a idade. No intento de fuxir da brancura hai quen opta por meter unha presa de sexo e violencia, cousas estas que os rapaces acabarán descubrindo, se é que non o fixeron aínda, mediante ferramentas mais directas que un libro e que por si mesmas non melloran nada o nivel literario da obra.

O verdadeiro problema é que a LIX segue apostando por uns temas e personaxes que reproducen os mesmos roles de sempre nos mesmos escenarios de sempre. Non ofrecen modelos diferentes, non ofrecen outras posibilidades e outros xeitos de ver o mundo. Non podemos seguir con novelas de pandillas, de adolescentes en institutos, ou polo menos non podemos seguir con novelas ambientadas en institutos dun barrio da Coruña ou de Vigo. De facelas, por que non ambientalas nun instituto de Dakar ou Ougadougou? Por que non ha de haber libros que falen do medo á morte, da soidade, da loucura, da traición, da maldade non sempre castigada? Ou da esperanza, da imaxinación, da fantasía e do amor, en todas as súas variantes? Por que non acabar dunha vez por todas con esa LIX que non trata ningún tema e se limita a contar peripecias? E por que non apostar pola linguaxe e a beleza expresiva, coas mesmas ganas pero con diferentes recursos do que o faríamos na literatura para adultos?

Non é doado loitar contra unha inercia de décadas, pero hai que intentalo. Como coordinador editorial de Edicións Tambre, Ignacio Chao leva algún tempo na procura dunha literatura que non se faga vella en tres meses, e ás veces e como froito desa permanente curiosidade aparece unha pequena alfaia. Acaba de saír á venta Sari, soñador de mares, de Marcos S. Calveiro, un libro de enorme poder evocador, con ecos evidentemente cunqueiráns, si, pero no que é igualmente posíbel achar a pegada de Álvaro Mutis e o seu ciclo de Maqqroll el Gaviero. Unha homenaxe á palabra e á fabulación escrita con parágrafos de enorme beleza, cunha riqueza léxica infrecuente nun xénero coma este tantas veces maltratado. Os meus máis sinceros parabéns para o autor, por ser dono dunha prosa magnífica sen data de caducidade.

2006-03-02, 11:56 | 3 comentarios

Referencias (TrackBacks)

URL de trackback de esta historia http://pawley.blogalia.com//trackbacks/37882

Comentarios

1
De: Oscar González Fecha: 2006-03-02 20:22

Aunque reparo ordenadores y hago alguna que otra página web no fue hasta el otro día que ví el reportaje de Faro De Vigo sobre los blogs que me he animado a investigar sobre las posibilidades de estos. He puesto en mi recien creado blog enlaces a todos los blog gallegos que se nombraban en el susodicho. Esta es la dirección, si os apetece, os dais una vuelta aunque el contenido no necesariamente os llame la atención (motociclismo). Gracias de antemano.

Oscar González Vigo-Pontevedra-España

http://motopasion.blogspot.com/



2
De: folerpa Fecha: 2006-03-03 10:03

Grazas pola túa xenerosidade Martin



3
De: Pepita Pérez Fecha: 2006-05-13 23:51

Querido Óscar:

Cada vez admiro más tu poderososa capacidad de "alargar" el tiempo y emplearlo tan bien...

Enhorabuena y gracias.

De mayor...,¡¡¡ me gustaría ser como tú!!!



Nombre
Correo-e
URL
Dirección IP: 54.156.67.122 (20fa5e6ad8)
Comentario









os arquivos estranhos




correo:diasestranhos()gmail.com

O sistema de comentarios está á disposición dos lectores de "signos de vida" (antes "días estranhos") exclusivamente para a publicación de opinións e comentarios relacionados co contido deste blog. Calquera texto publicado por medio do referido sistema non reflicte necesariamente a opinión do autor deste blog. As opinións e informacións publicadas no sistema de comentarios son de autoría e responsabilidade integral dos leitores que del fixeran uso. O autor deste blog resérvase o dereito de suprimir os comentarios e textos que considere ofensivos, difamatorios, calumniosos, preconceitosos ou de algunha forma perxudiciais a terceiros. Textos de carácter promocional ou inseridos no sistema sen a debida identificación do autor (nome completo e enderezo válido de e-mail) tamén poderán ser eliminados.


Licenza de 
Creative Commons
Esta obra está baixo unha licenza Recoñecemento-NonComercial-CompartirIgual 2.5 de Creative Commons. Blogalia

Blogalia

(c) Martin Pawley