caderno dun rencoroso enfermo de cinefilia
Inicio > Historias > La Coz
> La Coz <

Experimento sentimentos contraditorios arredor de La Voz de Galicia que fan que non me resulte cómodo falar dela. Podería queixarme da atitude escasamente valente ao tratar certos asuntos, sempre procurando vestir de lealdade institucional o que moitas veces non deixa de ser pura entrega ao poder; hai cousa de dez anos o actual director do xornal, Bieito Rubido, definíao como oficialista, e en verdade esa é a palavra que melhor lhe encaixa. Calquera leitor sabe o que non pode agardar da Voz, pero (e aí radica a grandeza dese meio), calquera sabe tamén o que si pode agardar. Xa sexa pola vontade explícita dos que o fan ou arrastrado pola marea humana que o convertiu no xornal máis vendido da Galiza e con abrumadora distancia sobre os demais, La Voz non falhou nunca aos cidadáns do país nos momentos verdadeiramente decisivos. As reaccións ante a crise do Prestige terían sido moi diferentes se neses primeiros días non apostase por unha información esperta e crítica, seguros de que un petroleiro á deriva era o xerme dunha traxedia nun momento no que a prensa de Madrid andaba completamente na verza. Non estivo soa nese labor, e é certo que outros xornais, como La Opinión, bateron con máis intensidade sobre os culpáveis da desfeita, pero é innegável que cunha moito menor repercusión. Todos sabemos que na Galiza só unha portada da Voz é quen de provocar inquietude e nerviosismo, de remexer despachos e teléfonos. O que non sae nela é como se non existise, ou como se existise pouco.

Polas mesmas razóns, só unha xigantesca empresa periodística como La Voz de Galicia pode promover iniciativas culturais históricas como a difusión da Biblioteca 120, por exemplo. Hoxe hai espalhados polos fogares do país catro milhóns de livros en galego con algunhas das obras máis importantes da historia da nosa literatura, desde as Cantigas medievais até o ¿Que me queres, amor? de Manuel Rivas. Os que cremos necesario sacar a cultura dos mausoleos porentos aos que soe ser confinada non podemos senón estarlhe agradecidos de que miles de persoas se tenhan achegado de verdade aos versos de Rosalía cando o seu xornal fixo unha aposta pola cultura non exenta de risco.

Por todo iso ás veces sabemos perdoarlhe á Voz boa parte dos seus defeitos, desde a prepotente arrogancia coa que trata aos vendedores de prensa até a estranha indefinición ideolóxica (no fondo tan ben definida) na que aparentemente se move. Aceptámolo como mal menor, coa permanente esperanza de que algún día a súa forma de ver o mundo será distinta; e non pido que sexa igual á minha, pois xustamente eu o que quero é ler visións diferentes para eu poder contrastar as proprias. Pero si necesito opinións escépticas, independentes e ousadas, que traten a todos por igual e que non fabriquen epítetos para uns e non para outros. Que non se deixen levar polo medo e os tópicos que invaden o (in)mundo actual, que pensen coa cabeza e tamén co corazón, pero sobre todo que nunca se deixen guiar pola carteira.

O que non quero son máis Alfonsos de la Vega nin Arturos Maneiros vomitando sobre o papel os seus prexuízos de beata grande y libre. Non quero Calazas conspiranoicos facendo crónica de cousas que só parecen existir na súa mente. E non quero nunca máis páxinas coma esta, celebrando cunha entrevista odiosa os vinte e cinco anos no poder de quen preside un governo corrupto.

Eu aínda gardo esperanzas, quizá porque tampouco tenho alternativa.

2004-04-24, 01:00 | 12 comentarios

Referencias (TrackBacks)

URL de trackback de esta historia http://pawley.blogalia.com//trackbacks/17931

Comentarios

1
De: Vendell Fecha: 2004-04-24 21:36

Noraboa pola súa crítica, Pawley. Neste país de contrastes La Voz engade un punto de fantasía as nosas lecturas. O artigo ese do alcalde de Sada é pra enmarcar.



2
De: deneno Fecha: 2004-04-24 23:13

"Calquera leitor sabe o que non pode agardar da Voz"

Deberíamos empezar uma campaña de e-mails ou algo para con ós responsabéis da Coz a ver se nos tenhen un pouco mais en conta, sempre pensei que igual pensan que non existimos, que somos invisíbels xa que non lles exisimos demasiado (ou nada), que parece que danos todo un pouco igual, que imos seguir coa marea lendo e comprando o xornal a pesares dos desprezos constantes...



3
De: Indi Fecha: 2004-04-24 23:33

Por esta vez non comparto practicamente nada no referente ao análise de "La Voz de Galicia". E son masoquista-lector ou viceversa dela de hai longas épocas, tírame o seu estilo xermánico da cabeceira.
Como toda empresa ten os riscos moi calculados e a biblioteca 120 conseguiu encher moitos andeis nas casas vecinhais e menos de 10 lectores por libro, seguro.
Non nego a capacidade de moita xente que trabalha nese xornal e que as veces aparecen artigos, que deixa colar sabiamente e economicamente, para que moitos paspalláns coma nós sigamos a tela en consideración.
Agora os xornais sonche coma os Bancos que che venden olas a presión. Están cheas de baratilhas cando o que un pretende e ler outras opinións.



4
De: Martin Pawley Fecha: 2004-04-25 01:48

Indi, a dicir verdade non sei moi ben en que discrepa vostede.

deneno, quizá si fose conveniente facerlhes saber a nosa opinión como leitores; o que non sei é cal sería o melhor xeito.

Vendell, obrigado polas súas palavras. É o que ten madrugar os sábados, que un se volve máis lúcido. ;-)



5
De: Martin Pawley Fecha: 2004-04-25 19:56

Multiculturalismo a bombazos, por Alfonso de la Vega.



6
De: Martin Pawley Fecha: 2004-04-25 20:03

Política electoralista, de Juan José Calaza



7
De: ro Fecha: 2004-04-27 11:30

lamento estar en desacordo en boa parte, mr. pawley.

non hai dúbida de q la voz é o mellor xornal de gz e un dos mellores do estado. son os q teñen máis medios e os mellores xornalistas. ata aquí, concordo con vostede.

pero a partir de aquí, martin, non podo máis q disentir. se ben é certo q durante os primeiros 2 meses despois do accidente do prestige la voz comportouse de forma exemplar, a partir de aí vendeuse escandalosamente.

hai razóns q o explican, todas elas económicas que proveñen da presión asfixiante do goberno, pero non por iso llas vou perdoar.

eu non merco la voz, mr. pawley, desde entón. pero non podo vivir sen ela, así q a leo na rede ou no bar. porque non se pode dar bandazos tan espectaculares na liña editorial. simplemente non é de recibo.

pero hai máis razóns. a nós -os "galeguistas", por chamarlle dalgún xeito- téñennos caladiños coa nosa cota de opinadores (díaz pardo, freixanes e algún máis), pero a súa postura nalgúns temas fundamentais deu e segue a dar noxo. a súa sección de cultura é mala con ganas, ademais de ser feita de costas ao país. o mesmo acontece en cuestións políticas: a voz sempre está co goberno, sexa quen sexa (non hai máis q velo despois do 11-M como cambiou a sección España).

habería moito máis q dicir, pero hoxe non teño tempo. só dicir q estou de acordo con quen falaba de buscar unha forma de presión para q nos tiveran en conta.

un saúdo.



8
De: xinelo Fecha: 2004-04-28 15:38

A min o que me gusta é este tipo de labazadas ;) Seguramente non se imaxinan a que se expoñen porque non entenden de que vai a historia.

http://www.lavozdegalicia.es/debate/debateampliar.jsp?carta=carta22.txt&pagina=2

En fin, polo menos teñen ao seu favor a non-censura da labazada.



9
De: Brocco Fecha: 2004-04-30 19:36

Dou fe, como becaria explotada e maltratada, do conservadurismo nas formas e no fondo do equipo da Voz, a censura descarada e o tendencioso das súas informacións. Ó carallo. E ademís pagan unha merda, os moi ladrós.

http://www.tripasnegras.com/brocco/



10
De: Martin Pawley Fecha: 2004-04-30 20:10

Brocco, podería vostede entrar en detalhes?



11
De: Franky Fecha: 2004-05-03 20:06

Hai outros medios que mantenhen unha linha informativa de credibilidade e non apenas durante dous meses como lhe aconteceu a LaCoz co Prestige.
Unha portada da Voz pode influir no norte galego..., no sul, pela contra, o que diga FARO (inda ben!) ou LaRegion (oh, my god!)marcan a axenda.

Miramos moito po eixo Coru-Compos e hai vida mais alo, inda que o Depor (agardemos) vaia representarnos nesa final da Copa de europa.



12
De: Martin Pawley Fecha: 2004-05-03 21:11

Franky, non nego a influencia do Faro en Vigo, da Región en Ourense e do Progreso en Lugo. Nin sequera nego a pegada que ten o nefasto Correo Gallego na capital de Galiza. Agora ben, o único meio que pode presumir de ter presenza en todo o territorio do noso país é La Voz, que tamén supera con moito as audiencias de todos os demais xornais xuntos. Se El Correo Gallego actúa coa docilidade que o caracteriza tanto nos ten, xa non nos afecta o que diga. Pero La Voz si. Do comportamente da Voz nos primeiros meses do Prestige ao que fixo logo hai, en efecto, un bon treito, pero incluso iso pode disfrazarse con ese respeito institucional do que alardean sempre, e nesa absurda esperanza depositada por eles no inverosímil Plan Galicia. O problema é cando iso se xunta a outras moitas cousas; por iso escribín o que escribín.



Nombre
Correo-e
URL
Dirección IP: 54.197.75.83 (ccf77fbda8)
Comentario









os arquivos estranhos




correo:diasestranhos()gmail.com

O sistema de comentarios está á disposición dos lectores de "signos de vida" (antes "días estranhos") exclusivamente para a publicación de opinións e comentarios relacionados co contido deste blog. Calquera texto publicado por medio do referido sistema non reflicte necesariamente a opinión do autor deste blog. As opinións e informacións publicadas no sistema de comentarios son de autoría e responsabilidade integral dos leitores que del fixeran uso. O autor deste blog resérvase o dereito de suprimir os comentarios e textos que considere ofensivos, difamatorios, calumniosos, preconceitosos ou de algunha forma perxudiciais a terceiros. Textos de carácter promocional ou inseridos no sistema sen a debida identificación do autor (nome completo e enderezo válido de e-mail) tamén poderán ser eliminados.


Licenza de 
Creative Commons
Esta obra está baixo unha licenza Recoñecemento-NonComercial-CompartirIgual 2.5 de Creative Commons. Blogalia

Blogalia

(c) Martin Pawley