Non hai lazo xurídico nin límite institucional que una aos que non se queren. Días estranhos estes nos que dicir o que debera ser obvio vólvese excepción admirábel. O galego 1034 recoméndame a leitura do último libro de Suso de Toro, Españois todos. Escrito con paixón, con prosa contundente e brava, Españois todos é unha defensa enérxica da xenuína democracia, lonxe da parodia vagamente franquista na que fica hoxe convertida. Unha aposta valente e libre pola construción dun verdadeiro espazo común para todos os cidadáns asentado no recoñecemento das diferenzas:

Españois somos todos, mesmo aqueles que, con todo dereito, queren deixar de selo. Cada un o é ao seu xeito, con paixón ou con desdén, con afecto ou con xenreira, pero todas as persoas que temos un número de DNI o somos. Aínda que para uns sexa a nación que lle proporciona abeiro e identidade, para outros un edificio onde ocupan espazo e para outros unha nación-cárcere opresora. Así que todos os que temos un número asignado por este Estado xogamos á baralla española, temos o dereito, e o deber, de dicir en alto o que é para nós España. Sen temor. ¶