Hoxe, na noite do máximo das Perseidas, é inevitável falar de estrelas filantes, ou estrelas fugaces, ou mesmo estrelas-cadentes se o prefiren. Xa saben: unha partícula entra en contacto coa atmósfera e se desintegra por fricción, ponhéndose incandescente e deixando un vistoso trazo luminoso. Sen dúvida, un dos máis fermosos espectáculos que nos dá a noite.
Ás estrelas filantes sempre se lhes formularon desexos. Na tradición galega, pedíanselhe tres e concedían un. Ás veces, as estrelas filantes representan ánimas extraviadas e traen noticia de mortes e desgracias; para evitar o seu mal dise tres veces Deus te guíe ben guiada, que no Ceo foches nada, tal e como conta o fórmidável Diccionario dos seres míticos galegos. As desta noite son tamén conhecidas como Bágoas de San Lourenzo, pois a súa máxima actividade fica arredor da data do 10 de agosto en que se celebra a súa festividade. Os meteoros virían ser como as bágoas que deitou o santo no seu martirio.

Aproveiten a boa temperatura da noite e pídanlhe ás estrelas moitos desexos. E logo, fagan o posível para que se cumpran.

os mitos do ceo (IV)
¶